മലയാളി കുവൈത്തില്‍ ഹൃദയാഘാതം മൂലം മരിച്ചു

കുവൈത്ത് സിറ്റി: കുവൈത്തില്‍ മലയാളി ഹൃദയാഘാതം മൂലം മരിച്ചു. കായംകുളം എരുവ സ്വദേശി നിരിട്ടേത്ത് സണ്ണി യോഹന്നാനെ (55) ആണ് സാല്‍മിയയിലെ താമസസ്ഥലത്തെ ശുചിമുറിയില്‍ മരിച്ച നിലയില്‍ കണ്ടെത്തിയത്. ഹൃദയാഘാതമാണ് മരണകാരണമെന്നാണു പ്രാഥമികനിഗമനം.

അര്‍ബുദബാധയെത്തുടര്‍ന്ന് ഇദ്ദേഹത്തിന്റെ ഭാര്യ കുറച്ചുനാളുകള്‍ക്ക് മുമ്പാണ് മരിച്ചത്. ഇതിനു പുറമെ ബക്കാല ജീവനക്കാരനായ ഇദ്ദേഹത്തിന്റെ താമസാനുമതി രേഖ ഈമാസം 15ന് അവസാനിക്കുകയും ചെയ്തിരുന്നു. ഇക്കാരണങ്ങളാല്‍ കനത്ത മാനസികസമ്മര്‍ദത്തിലായിരുന്നു ഇദ്ദേഹമെന്ന് സുഹൃത്തുക്കള്‍ അറിയിച്ചു. ഏക മകള്‍ നാട്ടിലാണ്.