സ്പാനിഷ് കോപ്പാ ഡെല്‍ റേ; ബാഴ്‌സയെ തകര്‍ത്തെറിഞ്ഞ് റയല്‍ ഫൈനലില്‍

മാഡ്രിഡ്: സ്പാനിഷ് കോപ്പാ ഡെല്‍ റേ ഫൈനലില്‍ പ്രവേശിച്ച് റയല്‍മാഡ്രിഡ്. ചിരവൈരികളായ ബാഴ്‌സലോണയെ എതിരില്ലാത്ത നാല് ഗോളിന് പരാജയപ്പെടുത്തിയാണ് റയലിന്റെ ഫൈനല്‍ പ്രവേശനം. ആദ്യ പാദത്തില്‍ ഒരു ഗോള്‍ ജയം നേടിയ ബാഴ്‌സയുടെ മേല്‍ നാല് ഗോളടിച്ചാണ് റയല്‍ രണ്ടാം പാദത്തില്‍ തിരിച്ചുവരവ് നടത്തിയത്.ആദ്യ പകുതിയില്‍ വിനീഷ്യസ് ജൂനിയര്‍ ഒരു ഗോള്‍ നേടി. രണ്ടാം പകുതിയില്‍ കരീം ബെന്‍സിമ ഹാട്രിക്ക് നേടി.മെയ്യ് ആറിന് നടക്കുന്ന ഫൈനലില്‍ ഒസാസുനയാണ് റയലിന്റെ എതിരാളികള്‍.

ഇംഗ്ലിഷ് പ്രീമിയര്‍ ലീഗില്‍ ഇന്ന് നടന്ന മല്‍സരത്തില്‍ ന്യൂകാസില്‍ യുനൈറ്റഡ് വെസ്റ്റ്ഹാമിനെ 5-1ന് തകര്‍ത്തു. ജയത്തോടെ ന്യൂകാസില്‍ മൂന്നാം സ്ഥാനം നിലനിര്‍ത്തി. മറ്റൊരു മല്‍സരത്തില്‍ ബ്രന്റ്‌ഫോഡിനെ എതിരില്ലാത്ത ഒരു ഗോളിന് വീഴ്ത്തി മാഞ്ചസ്റ്റര്‍ യുനൈറ്റഡ് നാലാം സ്ഥാനം നിലനിര്‍ത്തി.