'എല്ലാ കണ്ണുകളും റഫയില്‍'; ഫലസ്തീന് ഐക്യദാര്‍ഢ്യവുമായി ദുല്‍ഖര്‍ സല്‍മാന്‍

കൊച്ചി: ഇസ്രായേല്‍ കൂട്ടക്കൊല തുടരുന്നതിനിടെ ഫലസ്തീന്‍ ജനതയ്ക്ക് ഐക്യദാര്‍ഢ്യവുമായി ചലച്ചിത്ര താരം ദുല്‍ഖര്‍ സല്‍മാന്‍. എല്ലാ കണ്ണുകളും റഫയില്‍ എന്ന ചിത്രം ഇന്‍സ്റ്റഗ്രാം സ്‌റ്റോറിയായി പോസ്റ്റ് ചെയ്തു. റഫ അഭയാര്‍ഥി ക്യാംപിനു നേരെ ഇസ്രായേല്‍ ആക്രമണം നടത്തി 40ലേറെ പേരെ കൊലപ്പെടുത്തിയതിനു പിന്നാലെ നടക്കുന്ന കാംപയിനിലാണ് ദുല്‍ഖറും പങ്കാളിയായത്. കാന്‍ ഫിലിം ഫെസ്റ്റിവല്‍ വേദിയില്‍ മലയാളി താരം കനി കുസൃതി ഫലസ്തീന് ഐക്യദാര്‍ഢ്യവുമായി തണ്ണിമത്തന്‍ വാനിറ്റി ബാഗ് ധരിച്ചെത്തിയത് അന്താരാഷ്ട്രതലത്തില്‍ തന്നെ വന്‍ ചര്‍ച്ചയായിരുന്നു. കനി അഭിനയിച്ച പായല്‍ കപാഡിയ ചിത്രം 'ഓള്‍ വി ഇമാജിന്‍ ആസ് ലൈറ്റി'ന് ഫെസ്റ്റിവലില്‍ ഗ്രാന്‍ഡ് പ്രീ പുരസ്‌കാരം ലഭിച്ചിരുന്നു. കനിക്കു പിന്നാലെയാണ് ദുല്‍ഖര്‍ സല്‍മാനും റഫ ഐക്യദാര്‍ഢ്യവുമായെത്തിയത്. നിരവധി പേരാണ് ദുല്‍ഖറിന്റെ സ്റ്റോറിക്ക് പ്രതികരണവുമായെത്തിയത്.