ആലുവയില്‍ ട്രെയ്‌നില്‍ എത്തിച്ച 35 കിലോഗ്രാം കഞ്ചാവ് പിടികൂടി; സ്ത്രീകള്‍ അടക്കം മൂന്നു പേര്‍ പിടിയില്‍

കൊച്ചി: ആലുവയില്‍ 35 കിലോഗ്രാം കഞ്ചാവ് പിടിച്ചു. ബാഗുകളിലാക്കി കൊണ്ടുവന്ന 35 കിലോഗ്രാം കഞ്ചാവാണ് ഡാന്‍സാഫ് ടീമും പോലീസും ചേര്‍ന്ന് പിടികൂടിയത്. സംഭവത്തില്‍ രണ്ട് സ്ത്രീകള്‍ ഉള്‍പ്പെടെ മൂന്നുപേരെ പോലിസ് കസ്റ്റഡിയില്‍ എടുത്തു. ഒഡീഷയിലെ റായ്ഗഡ് സ്വദേശികളായ സത്യനായ്ക്, ആശ പ്രമോദ് ലിമ, അസന്തി താക്കൂര്‍ എന്നിവരാണ് പിടിയിലായത്.

പുലര്‍ച്ചെ രണ്ടിന് റെയില്‍വേ സ്‌റ്റേഷനില്‍ വന്നിറങ്ങിയ സംഘത്തെ പോലീസ് പിടികൂടുകയായിരുന്നു. ഒഡീഷയില്‍നിന്ന് വന്‍തോതില്‍ കഞ്ചാവ് എത്തിച്ച് കേരളത്തിലെ വിവിധ പ്രദേശങ്ങളില്‍ വിതരണം നടത്തുന്ന സംഘത്തിലെ കണ്ണികളാണ് ഇവരെന്ന് പോലീസ് അറിയിച്ചു. ആലുവ റൂറല്‍ ജില്ല പോലീസ് മേധാവി വൈഭവ് സക്‌സേനയ്ക്ക് ലഭിച്ച രഹസ്യവിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് മൂന്നംഗസംഘം പിടിയിലായത്.