ഒമാന്‍ ഒഴികെയുള്ള ഗള്‍ഫ് രാജ്യങ്ങളില്‍ ഇന്ന് ബലിപെരുന്നാള്‍; കേരളത്തില്‍ നാളെ

മക്ക: ത്യാഗത്തിന്റെയും സമര്‍പ്പണത്തിന്റെയും ഓര്‍മകള്‍ അയവിറക്കി വിശ്വാസിലോകം വീണ്ടുമൊരു ബലിപെരുന്നാള്‍ ആഘോഷത്തില്‍. ഒമാന്‍ ഒഴികെയുള്ള ഗള്‍ഫ് രാഷ്ട്രങ്ങളില്‍ ഇന്ന് പെരുന്നാള്‍ ആഘോഷിക്കുകയാണ്. യുഎഇ, സൗദി, അബൂദബി ഉള്‍പ്പെടെയുള്ള ഗള്‍ഫ് രാജ്യങ്ങളിലെല്ലാം ഇന്നാണ് പെരുന്നാള്‍. കേരളത്തില്‍ നാളെയാണ് ബലി പെരുന്നാള്‍ ആഘോഷിക്കുന്നത്. പ്രവാസലോകത്ത് ഇത്തവണ കനത്ത ചൂടിനിടയിലാണ് ഇത്തവണ പെരുന്നാള്‍ ആഘോഷം. വിവിധ രാജ്യങ്ങളില്‍ പെരുന്നാള്‍ നമസ്‌കാരത്തിന് പ്രത്യേകസൗകര്യങ്ങള്‍ ഏര്‍പ്പെടുത്തിയിരുന്നു. ഈദ്ഗാഹുകളിലും പള്ളികളിലും വന്‍ തിരക്കാണ് അനുഭവപ്പെട്ടത്. മലയാളികള്‍ക്കായി യുഎഇയില്‍ പ്രത്യേക ഈദ്ഗാഹുകള്‍ ഒരുക്കിയിരുന്നു. പോലിസ്, മുനിസിപ്പാലിറ്റി തുടങ്ങിയ വകുപ്പുകളുമായി ഏകോപിപ്പിച്ചാണ് സൗകര്യങ്ങള്‍ ഒരുക്കിയത്. മലയാളത്തിനുപുറമേ തമിഴ്, ഉറുദു, ഇംഗഌഷ് ഭാഷകളിലും പെരുന്നാള്‍ ഖുതുബ നിര്‍വഹിച്ചു.

കനത്തചൂടിനെ പ്രതിരോധിക്കാന്‍ പെരുന്നാള്‍ പ്രാര്‍ഥനകള്‍ നടക്കുന്ന ഇടങ്ങളില്‍ ആവശ്യമായ ശീതീകരണ സംവിധാനങ്ങളും ഒരുക്കിയിരുന്നു. പെരുന്നാള്‍ നമസ്‌കാരത്തിനുശേഷം ബലികര്‍മങ്ങള്‍ നടത്തി. ആഘോഷ ഭാഗമായി പരസ്പരം ആശംസകള്‍ അറിയിച്ചും കുടുബങ്ങസംഗമങ്ങളും നടത്തുന്നുണ്ട്. കേരളത്തില്‍ തിങ്കളാഴ്ചയാണ് ബലി പെരുന്നാള്‍ ആഘോഷിക്കുന്നത്. ആഘോഷത്തെ വരവേല്‍ക്കാന്‍ മലയാളികളും ഒരുങ്ങിക്കഴിഞ്ഞു. പള്ളികളില്‍ രാവിലെ തന്നെ പെരുന്നാള്‍ നമസ്‌കാരം നടക്കും. മധുരം വിതരണം ചെയ്തും കുടുംബവീടുകള്‍ സന്ദര്‍ശിച്ചും ആഘോഷത്തില്‍ പങ്കുചേരും.