കളിക്കുന്നതിനിടെ മരക്കൊമ്പ് വീണ് എട്ടുവയസ്സുകാരന്‍ മരണപ്പെട്ടു

കൊച്ചി: ഫുട്‌ബോള്‍ കളിക്കുന്നതിനിടെ ശക്തമായ കാറ്റില്‍ മരക്കൊമ്പ് ഒടിഞ്ഞുവീണ് എട്ടുവയസ്സുകാരന് ദാരുണാന്ത്യം. ആലുവ കാരോട്ടുപറമ്പില്‍ രാജേഷിന്റെ മകന്‍ അഭിനവ് കൃഷ്ണയാണ് മരണപ്പെട്ടത്. അപകടത്തില്‍ പരിക്കേറ്റ രണ്ടുകുട്ടികളെ ആശുപത്രിയില്‍ പ്രവേശിപ്പിച്ചു. ശനിയാഴ്ച രാവിലെ 11 ഓടെയാണ് സംഭവം. കിഴക്കേവെളിയത്തുനാട് മില്ലുപടിക്ക് സമീപം വെള്ളാംഭഗവതി ക്ഷേത്രത്തിലെ ആല്‍മരത്തിന്റെ കൊമ്പാണ് ഒടിഞ്ഞുവീണത്. പൊടുന്നനെയുണ്ടായ ശക്തമായ കാറ്റില്‍ ആല്‍മരത്തിന്റെ കൊമ്പ് ഫുട്‌ബോള്‍ കളിക്കുകയായിരുന്ന കുട്ടികളുടെ മേല്‍ വീഴുകയായിരുന്നു. ഉടന്‍തന്നെ നാട്ടുകാര്‍ രക്ഷാപ്രവര്‍ത്തനം നടത്തിയെങ്കിലും തലയ്ക്ക് ഗുരുതരമായി പരിക്കേറ്റ അഭിനവ് മരണപ്പെടുകയായിരുന്നു.