തൃശൂർ: ഗുണമേന്മയുള്ള വിദ്യാഭ്യാസം വിദ്യാർത്ഥികളുടെ അവകാശമാണെന്ന് ഉന്നത വിദ്യാഭ്യാസ - സാമൂഹ്യനീതി വകുപ്പ് മന്ത്രി ഡോ.ആർ ബിന്ദു. അരിമ്പൂർ പഞ്ചായത്തിലെ ഗവൺമെന്റ് യുപി സ്കൂളിൽ വിദ്യാകിരണം പദ്ധതിയിൽ ഉൾപ്പെടുത്തി നിർമ്മാണം പൂർത്തിയാക്കിയ പുതിയ കെട്ടിടത്തിൻ്റെ ഉദ്ഘാടനം നിർവഹിക്കുകയായിരുന്നു മന്ത്രി. സ്കൂളുകളുടെ ഭൗതിക സാഹചര്യങ്ങൾ കൂടുതൽ മെച്ചപ്പെടുത്താനുള്ള പ്രവർത്തനങ്ങളാണ് സംസ്ഥാന സർക്കാർ നടപ്പിലാക്കുന്നത്. പൊതുവിദ്യാഭ്യാസ സ്ഥാപനങ്ങൾ മികവിൻ്റെ കേന്ദ്രങ്ങളായി മാറിയെന്നും മന്ത്രി പറഞ്ഞു.
ഉന്നത വിദ്യാഭ്യാസ മേഖലയുടെ സമഗ്ര വികസനം ലക്ഷ്യമിട്ട് ആയിരം കോടിയിലധികം രൂപയുടെ പ്രവർത്തനങ്ങളാണ് സർക്കാർ നടത്തുന്നത്. ലോകോത്തര നിലവാരത്തിലുള്ള സംവിധാനങ്ങൾ കലാലയങ്ങളിൽ ലഭ്യമാക്കണം എന്നതാണ് സർക്കാരിൻ്റെ ലക്ഷ്യമെന്നും മന്ത്രി പറഞ്ഞു.
അരിമ്പൂർ ഗ്രാമപഞ്ചായത്തിലെ ഏക സർക്കാർ വിദ്യാലയമായ ഗവ.യു പി സ്കൂളിൽ ഒരു കോടി രൂപ ചെലവഴിച്ചാണ് പുതിയ അക്കാദമിക്ക് ബ്ലോക്ക് നിർമിച്ചത്. ഇരുനിലകളിലുള്ള കെട്ടിടത്തിൻ്റെ ആറ് ക്ലാസ് മുറികളും ഹൈടെക് നിലവാരത്തിലാണ് നിർമ്മിച്ചിരിക്കുന്നത്. ഇതിന് പുറമെ അരിമ്പൂർ ഗ്രാമപഞ്ചായത്തിന്റെ ജനകീയാസൂത്രണം പദ്ധതിയിൽ ഉൾപ്പെടുത്തി 6.40 ലക്ഷം രൂപ ചെലവഴിച്ച് ക്ലാസ് മുറികളിലേക്ക് ഫർണിച്ചറുകളും ഡിജിറ്റൽ ഉപകരണങ്ങളും ലഭ്യമാക്കും. 1912 ലാണ് സ്കൂൾ സ്ഥാപിതമായത്.
ചടങ്ങിൽ മുരളി പെരുന്നെല്ലി എംഎൽഎ അധ്യക്ഷത വഹിച്ചു. പഞ്ചായത്ത് പ്രസിഡൻ്റ് സ്മിത അജയകുമാർ, വൈസ് പ്രസിഡൻ്റ് ഷിമി ഗോപി, ജില്ലാ പഞ്ചായത്ത് അംഗങ്ങളായ വി എൻ സുർജിത്, ജിമ്മി ചൂണ്ടൽ, ബ്ലോക്ക് പഞ്ചായത്ത് അംഗങ്ങൾ, മറ്റ് ജനപ്രതിനിധികൾ, പ്രധാനധ്യാപിക പി ഉഷാകുമാരി, അധ്യാപകർ, പൊതുമരാമത്ത് വകുപ്പ് എക്സിക്യൂട്ടിവ് എൻജിനീയർ പിവി ബിജി തുടങ്ങിയവർ പങ്കെടുത്തു.