സന്തോഷ് ട്രോഫിയില്‍ കേരളത്തിന് വിജയതുടക്കം; ഏഴ് ഗോള്‍ ത്രില്ലറില്‍ ഗോവയെ വീഴ്ത്തി
ഹൈദരാബാദ്: സന്തോഷ് ട്രോഫി ഫൈനല്‍ റൗണ്ടില്‍ കേരളത്തിനു വിജയത്തുടക്കം. 4-3നു കേരളം ഗോവയെ വീഴ്ത്തി. കഴിഞ്ഞ ടൂര്‍ണമെന്റില്‍ ക്വാര്‍ട്ടറില്‍ ഗോവ കേരളത്തെ പരാജയപ്പെടുത്തിയിരുന്നു. അതിനുള്ള മധുര പ്രതികാരമായി ആദ്യ ജയം. 15ാം മിനിറ്റില്‍ പിടി മുഹമ്മദ് റിയാസ്, 20ാം മിനിറ്റില്‍ മുഹമ്മദ് അജ്‌സല്‍, 32ാം മിനിറ്റില്‍ നസീബ് റഹ്‌മാന്‍, 69 മിനിറ്റില്‍ ക്രിസ്റ്റി ഡേവിസ് എന്നിവരാണ് കേരളത്തിനായി ഗോളുകള്‍ നേടിയത്. രണ്ടാം മിനിറ്റില്‍ തന്നെ ഗോവ നീഖല്‍ ഫെര്‍ണാണ്ടസിലൂടെ മുന്നിലെത്തിയിരുന്നു. പിന്നീടാണ് കേരളം തിരിച്ചടി തുടങ്ങിയത്. 76, 86 മിനിറ്റുകളില്‍ ഷുബേര്‍ട്ട് ജോനസ് പെരേര നേടിയ ഇരട്ട ഗോളിലൂടെ ഗോവ സമനിലക്കായി പൊരുതിയെങ്കിലും ലക്ഷ്യത്തിലെത്തും മുന്‍പ് വീണു.
തുടക്കത്തില്‍ ഗോള്‍ വഴങ്ങിയിട്ടും കേരളം സമ്മര്‍ദ്ദം അതിജീവിച്ചാണ് പൊരുതി കയറിയത്. ആദ്യ പകുതിയില്‍ 3-1ന്റെ ലീഡുണ്ടായിരുന്നു കേരളത്തിന്. പിന്നീടാണ് അവസാന ഘട്ടങ്ങളില്‍ ഗോവ തിരിച്ചടിക്ക് കോപ്പു കൂട്ടിയത്.