യുവതിയെ ലൈംഗികമായി പീഡിപ്പിച്ചു; എല്‍ദോസ് കുന്നപ്പള്ളി എംഎൽഎക്കെതിരേ കേസ്
കഴിഞ്ഞ ദിവസം മജിസ്‌ട്രേറ്റ് മുമ്പില്‍ കൊടുത്ത മൊഴിയിലാണ് യുവതി പീഡന ആരോപണങ്ങള്‍ ഉന്നയിച്ചത്. യുവതിയുടെ പൂര്‍ണമായ മൊഴിയെടുക്കാന്‍ കഴിഞ്ഞിട്ടില്ലെന്ന് പോലിസ് പറഞ്ഞു.
തിരുവനന്തപുരം: പെരുമ്പാവൂര്‍ എംഎല്‍എ എല്‍ദോസ് കുന്നപ്പള്ളിക്കെതിരേ ജാമ്യമില്ലാ വകുപ്പ് പ്രകാരം പോലിസ് കേസ് എടുത്തു. ലൈംഗികമായി പീഡിപ്പിച്ചുവെന്ന യുവതിയുടെ പരാതിയിലാണ് പോലിസ് നടപടി. കേസ് ജില്ലാ ക്രൈംബ്രാഞ്ചിന് കൈമാറും.
അതിക്രമിച്ച് കയറി തട്ടിക്കൊണ്ടുപോയി ഉപദ്രവിച്ചു, സ്ത്രീത്വത്തെ ഹനിക്കുന്ന രീതിയില്‍ പെരുമാറി എന്നീ വകുപ്പുകള്‍ പ്രകാരമാണ് കോവളം പോലിസ് കേസ് എടുത്തത്. കഴിഞ്ഞ ദിവസം മജിസ്‌ട്രേറ്റ് മുമ്പില്‍ കൊടുത്ത മൊഴിയിലാണ് യുവതി പീഡന ആരോപണങ്ങള്‍ ഉന്നയിച്ചത്. യുവതിയുടെ പൂര്‍ണമായ മൊഴിയെടുക്കാന്‍ കഴിഞ്ഞിട്ടില്ലെന്ന് പോലിസ് പറഞ്ഞു. മൊഴിയെടുക്കുന്നതിനിടെ ശാരീരികാസ്വാസ്ഥ്യങ്ങള്‍ ഉണ്ടായതിനെ തുടര്‍ന്ന് യുവതിയെ ആശപത്രിയിലേക്ക് മാറ്റി. യുവതിയുടെ മൊഴിയെയും പരാതിയെയും അടിസ്ഥാനപ്പെടുത്തിയാണ് എംഎല്‍എക്കെതിരെ ജാമ്യമില്ലാ വകുപ്പുകള്‍ കേസ് എടുത്തതെന്ന് കോവളം പോലിസ് പറഞ്ഞു.
കോവളത്ത് കാറില്‍ വെച്ച് എംഎല്‍എ കൈയ്യേറ്റം ചെയ്‌തെന്നും യുവതി മജിസ്‌ട്രേറ്റിന് മുമ്പാകെ മൊഴി നല്‍കിയിരുന്നു. കാറില്‍ വെച്ച് തന്നെ കൈയ്യേറ്റം ചെയ്ത സംഭവത്തില്‍ താന്‍ പരാതി നല്‍കിയതോടെ ഒത്തുതീര്‍ക്കാന്‍ സമ്മര്‍ദ്ദം ഉണ്ടായെന്നും പണം വാഗ്ദാനം ചെയ്‌തെന്നും യുവതി മജിസ്‌ട്രേറ്റിന് നല്‍കിയ മൊഴിയിലുണ്ട്.
കോവളത്ത് വെച്ച് കാറില്‍ യാത്ര ചെയ്യുമ്പോള്‍ മര്‍ദ്ദിച്ചുവെന്നാണ് ഒരാഴ്ച മുമ്പ് സ്ത്രീ നല്‍കിയ പരാതി. എന്നാല്‍ മൊഴി നല്‍കാന്‍ ഇവര്‍ തയ്യാറായില്ലെന്ന് പോലിസ് പറയുന്നു. കഴിഞ്ഞ ദിവസം ഇവരെ കാണാനില്ലെന്ന് കാട്ടി സുഹൃത്ത് കോവളം പോലിസില്‍ വീണ്ടും പരാതി നല്‍കി. പോലിസ് യുവതിയെ ഫോണില്‍ ബന്ധപ്പെട്ടപ്പോള്‍ തനിക്ക് വീട്ടില്‍ നില്‍ക്കാന്‍ കഴിയുന്നില്ലെന്നും അതിയായ സമ്മര്‍ദ്ദമുണ്ടെന്നും പറഞ്ഞു. താന്‍ നെയ്യാറ്റിന്‍കര ഭാഗത്തേക്ക് പോവുകയാണെന്നും പോലിസ് സംരക്ഷണം വേണമെന്നും ഇവര്‍ ആവശ്യപ്പെട്ടിരുന്നു.
കഴിഞ്ഞമാസം 14നാണ് കോവളത്ത് സൂയിസൈഡ് പോയിന്റിന് സമീപം കാറില്‍ വെച്ച് എല്‍ദോസ് കുന്നപ്പിള്ളി മര്‍ദ്ദിച്ചതെന്നാണ് അധ്യാപികയായ സ്ത്രീ പോലിസിന് ആദ്യം നല്‍കിയ പരാതി. സിറ്റി പോലിസ് കമ്മീഷണര്‍ക്ക് നല്‍കിയ പരാതി കോവളം പോലിസിന് കൈമാറുകയായിരുന്നു. ആലുവ സ്വദേശിയായ സ്ത്രീ തിരുവനന്തപുരത്തെ സ്‌കൂളിലെ അധ്യാപികയാണ്.