ഒന്നേകാല്‍ കിലോ കഞ്ചാവുമായി യുവാവ് പിടിയില്‍

തിരുവനന്തപുരം: നിരവധി ക്രിമിനല്‍ കേസുകളില്‍ പ്രതിയായ യുവാവിനെ ഒന്നേകാല്‍ കിലോ കഞ്ചാവുമായി എക്‌സൈസ് സംഘം പിടികൂടി. മേനംകുളം വിളയില്‍കുളം മാടന്‍കാവ് വീട്ടില്‍ വാവകൃഷ്ണന്‍ എന്നുവിളിക്കുന്ന കൃഷ്ണ എസ് ബാബുവാണ് ഇന്നുരാവിലെ എട്ടരയോടെ പിടിയിലായത്. കഞ്ചാവ് ബാഗിനുള്ളിലാക്കി ബൈക്കില്‍ പോകവേ വിളയില്‍കുളം- മേനകുളം റോഡിലുള്ള പോലിസ് വനിതാ ബറ്റാലിയന്‍ ആസ്ഥാനത്തിന് മുന്നില്‍വച്ച് കഴകൂട്ടം എക്‌സൈസ് റേഞ്ച് ഇന്‍സ്‌പെക്ടര്‍ എ പ്രതീപ് റാവുവും സംഘവുമാണ് ഇയാളെ പിടികൂടിയത്.

എട്ടു കിലോ കഞ്ചാവ് കടത്തിയതിനു തുമ്പ സ്റ്റേഷനില്‍ ഒരുകേസും നിരവധി ക്രിമിനല്‍ കേസുകളും ഇയാള്‍ക്കെതിരേ നിലവിലുണ്ടെന്ന് എക്‌സൈസ് ഉദ്യോഗസ്ഥര്‍ അറിയിച്ചു. കിലോ കണക്കിന് കഞ്ചാവ് തമിഴ്‌നാട്ടില്‍ നിന്നും വാഹനങ്ങളില്‍ കടത്തികൊണ്ട് കഴക്കൂട്ടം, മേനംകുളം, മുരുക്കുംപുഴ പ്രദേശങ്ങളില്‍ യുവാക്കള്‍ക്ക് ചില്ലറ കച്ചവടം നടത്തുന്നതാണ് ഇയാളുടെ പതിവെന്നും എക്‌സൈസ് അറിയിച്ചു.