കൊല്ലത്തും എറണാകുളത്തും വാഹനാപകടങ്ങളിലായി നാല് മരണം

കൊച്ചി: സംസ്ഥാനത്ത് രണ്ടിടങ്ങളിലായി നടന്ന വാഹനാപകടങ്ങളില്‍ നാല് പേര്‍ മരിച്ചു. എറണാകുളം എസ്എന്‍ ജങ്ഷനില്‍ ലോറിയും ബൈക്കും കൂട്ടിയിടിച്ച് രണ്ട് യുവാക്കള്‍ മരിച്ചു. അര്‍ധരാത്രിയോടു കൂടിയുണ്ടായ അപകടത്തില്‍ ചോറ്റാനിക്കര സ്വദേശി അശ്വിന്‍ (20), ഉദയംപേരൂര്‍ സ്വദേശി വൈശാഖ് (20) എന്നിവരാണ് മരിച്ചത്. പരിക്കേറ്റ മറ്റൊരാള്‍ ആശുപത്രിയില്‍ ചികില്‍സയിലാണ്.

കൊല്ലം കുളക്കടയില്‍ കാറും ഓട്ടോയും തമ്മില്‍ കൂട്ടിയിടിച്ച് കൊട്ടാരക്കര പള്ളിക്കല്‍ സ്വദേശികളായ ബിനീഷ് കൃഷ്ണന്‍, ഭാര്യ അഞ്ചു എന്നിവരാണ് മരിച്ചത്. ഇവര്‍ ഓട്ടോയില്‍ സഞ്ചരിക്കുകയായിരുന്നു. മുന്ന് വയസ്സുള്ള കുഞ്ഞിനെ ഗുരുതരമായ പരിക്കുകളോടെ കൊല്ലത്തെ സ്വകാര്യാശുപത്രിയില്‍ പ്രവേശിപ്പിച്ചു. ഇന്നലെ അര്‍ധരാത്രിയില്‍ കൊട്ടാരക്കര ഭാഗത്തുനിന്നും വന്ന ഇന്നോവ കാറും അടൂര്‍ ഭാഗത്തുനിന്നും വന്ന ഓട്ടോയുമാണ് കൂട്ടിയിടിച്ചത്.