വിരമിച്ച പോസ്റ്റുമാന്‍ അവസാന ദിനം പച്ചക്കറി കിറ്റുകളും വിതരണം ചെയ്തു

പാലക്കാട്: തപാല്‍ വകുപ്പിലെ 32 വര്‍ഷത്തെ സേവനം പൂര്‍ത്തിയാക്കി വിരമിച്ച പോസ്റ്റ്മാന്‍ അവസാന ദിനം നാട്ടുകാരെ കാണാന്‍ എത്തിയത് പച്ചക്കറി കിറ്റുമായി. പാലക്കാട് മുണ്ടൂര്‍ മുതുകാട് പള്ളിക്കര വീട്ടില്‍ സതീഷ്‌കുമാറാണ് ദുരിത കാലത്ത് ജനങ്ങള്‍ക്ക് സഹായം നല്‍കി റിട്ടയര്‍മെന്റ് ദിനം അവിസ്മരണീയമാക്കിയത്.

കൊവിഡ് കാലത്ത് സഹായം എന്ന ആശയവുമായി ആഘോഷങ്ങള്‍ ഒഴിവാക്കി നാട്ടുകാര്‍ക്ക് സഹായം നല്‍കുകയായിരുന്നു. മുതുകാട് ഭാഗത്തെ 65 അയല്‍പ്പക്ക കുടുംബങ്ങള്‍ക്കാണ് നാളികേരമടക്കമുള്ള കിറ്റ് നല്‍കിയത്. പോസ്റ്റ് മാന്‍ പച്ചക്കറികളുമായി വീട്ടിലെത്തിയതോടെ നാട്ടുകാര്‍ക്കും സന്തോഷമായി.

മുണ്ടൂര്‍ നൊച്ചിപ്പുള്ളി പോസ്റ്റ് ഓഫീസിലെ ഇ.ഡി. പോസ്റ്റ്മാനായിട്ടായിരുന്നു സതീഷ്‌കുമാര്‍ സര്‍വീസ് തുടങ്ങുന്നത്. പിന്നീട് ഡിപ്പാര്‍ട്ട്‌മെന്റ് ടെസ്റ്റ് എഴുതി സ്ഥിരം പോസ്റ്റ്മാനായി. ജില്ലയിലെ വിവിധ തപാലോഫീസുകളില്‍ പ്രവര്‍ത്തിച്ചിട്ടുള്ള സതീഷ്‌കുമാര്‍ മികച്ച പോസ്റ്റ്മാനുള്ള അംഗീകാരവും ലഭിച്ചിട്ടുണ്ട്. പാലക്കാട് വിക്ടോറിയ കോളേജ് പോസ്റ്റോഫീസില്‍ നിന്നാണ് വിരമിച്ചത്.