കുളുവില്‍ മണ്ണിടിച്ചില്‍; വാഹനങ്ങളുടെ മുകളിലേക്ക് മരം കടപുഴകി വീണു, ആറ് മരണം

ഷിംല: ഹിമാചല്‍പ്രദേശില്‍ മണ്ണിടിച്ചിലില്‍ ആറ് പേര്‍ മരിച്ചു. കുളു ജില്ലയിലെ മണികരണിലാണ് അപകടമുണ്ടായത്. മരിച്ചവരില്‍ ഒരു വഴിയോര കച്ചവടക്കാരനും ഒരു കാര്‍ ഡ്രൈവറും സംഭവസ്ഥലത്തുണ്ടായിരുന്ന മൂന്ന് വിനോദസഞ്ചാരികളും ഉള്‍പ്പെടുന്നുവെന്നാണ് വിവരം. ഇന്ന് വൈകിട്ട് 5 മണിയോടെയാണ് അപകടം.

മണ്ണിടിച്ചിലില്‍ ഒട്ടേറെ പേര്‍ക്ക് പരിക്കേറ്റതായാണ് വിവരം. പരിക്കേറ്റ അഞ്ചു പേരെ ആശുപത്രികളില്‍ പ്രവേശിപ്പിച്ചു. വാഹനങ്ങളുടെ മുകളിലേക്ക് മരം കടപുഴകി വീഴുകയും ആളുകള്‍ അതിനിടയില്‍ പെടുകയുമായിരുന്നു. 'മണികരണ്‍ ഗുരുദ്വാരയ്ക്ക് സമീപമാണ് മണ്ണിടിച്ചിലുണ്ടായത്. പ്രദേശത്ത് രക്ഷാപ്രവര്‍ത്തനം പുരോഗമിക്കുകയാണ്. പോലിസും ജില്ലാ ഭരണകൂടത്തിന്റെ രക്ഷാപ്രവര്‍ത്തകരും ചേര്‍ന്ന് പരിക്കേറ്റവരെ ജാരിയിലെ പ്രാദേശിക കമ്മ്യൂണിറ്റി ആശുപത്രിയിലേക്ക് മാറ്റി, ''കുളു അഡീഷണല്‍ ജില്ലാ മജിസ്‌ട്രേറ്റ് അശ്വനി കുമാര്‍ എഎന്‍ഐയോട് പറഞ്ഞു.