ലോക്ക് ഡൗണ്‍: ബാങ്ക് ഉപഭോക്തൃ സേവനകേന്ദ്രം അടപ്പിച്ചതായി പരാതി

പയ്യോളി: ലോക്ക് ഡൗണ്‍ സമയത്ത് തുറന്നുപ്രവര്‍ത്തിക്കാന്‍ അനുമതിയുള്ള ബാങ്ക് ഉപഭോക്തൃ സേവനകേന്ദ്രം അടപ്പിച്ചതായി പരാതി. ദേശസാത്കൃത ബാങ്കിന്റെ പയ്യോളിയിലെ ഉപഭോക്തൃ സേവനകേന്ദ്രമാണ് സെക്ടറല്‍ മജിസ്‌ട്രേറ്റ് ഇടപെട്ട് അടപ്പിച്ചത്. തുറന്നുപ്രവര്‍ത്തിക്കാന്‍ വേണ്ട അനുമതി പത്രങ്ങള്‍ സമര്‍പ്പിച്ചിട്ടും അംഗീകരിച്ചില്ല.

ബാങ്ക് ഉപഭോക്താക്കള്‍ക്ക് സേവനം ലഭിക്കുന്ന കേന്ദ്രങ്ങള്‍ തുറന്നുപ്രവര്‍ത്തിക്കാന്‍ വേണ്ടി കേന്ദ്ര സര്‍ക്കാര്‍ ഈ സ്ഥാപനങ്ങളെ നേരത്തെ അവശ്യസര്‍വീസ് വിഭാഗത്തില്‍ ഉള്‍പ്പെടുത്തിയിട്ടുണ്ട്. എന്നാല്‍, ഇത് അംഗീകരിക്കില്ലെന്നും കേസെടുക്കുമെന്ന് ഭീഷണിപ്പെടുത്തിയാണ് അടപ്പിച്ചതെന്നും പരാതിക്കാരന്‍ പറയുന്നു. ജില്ലയില്‍ ഇത്തരത്തില്‍ നിരവധി സ്ഥാപനങ്ങള്‍ പ്രവര്‍ത്തിക്കുന്നുണ്ട്. ചിലയിടങ്ങളില്‍ മാത്രമാണ് അനുമതി നിഷേധിക്കുന്നത്.