ബഹ്‌റയ്‌ന്റെ ആദ്യ ഗോള്‍ഡന്‍ വിസ സ്വന്തമാക്കി എം എ യൂസുഫലി

മനാമ: ബഹ്‌റയ്‌ന്റെ ആദ്യ ഗോള്‍ഡന്‍ വിസ സ്വന്തമാക്കി പ്രവാസി വ്യവസായിയും ലുലു ഗ്രൂപ്പ് ചെയര്‍മാനുമായ എം എ യൂസുഫലി. ബഹ്‌റയ്ന്‍ അടുത്തിടെ പ്രഖ്യാപിച്ച 10 വര്‍ഷത്തെ ഗോള്‍ഡന്‍ വിസയാണ് എം എ യൂസുഫലി സ്വന്തമാക്കിയത്.

ഞായറാഴ്ച ഗുദൈബിയ പാലസില്‍ ചേര്‍ന്ന മന്ത്രിസഭാ യോഗത്തിലാണ് ആദ്യ ഗോള്‍ഡന്‍ വിസ 001 നമ്പറില്‍ എം എ യുസുഫലിക്ക് നല്‍കാന്‍ തീരുമാനമായത്.

ബഹുമതി അഭിമാനകരമാണെന്നും രാജാവ് ഹമദ് ബിന്‍ ഈസ അല്‍ ഖലീഫക്കും പ്രധാനമന്ത്രിയും കിരീടാവകാശിയുമായ സല്‍മാന്‍ ബിന്‍ ഹമദ് അല്‍ ഖലീഫക്കും ബഹ്‌റയ്ന്‍ സര്‍ക്കാരിനും നന്ദി പറയുന്നതായും യൂസഫലി പറഞ്ഞു.

ഗോള്‍ഡന്‍ വിസ പ്രഖ്യാപിച്ച ഭരണാധികാരികളുടെ തീരുമാനം ഈ മേഖലയിലെ പ്രധാന നിക്ഷേപവ്യാപാര കേന്ദ്രങ്ങളിലൊന്നായി ബഹ്‌റയ്‌ന്റെ പ്രതിച്ഛായ വര്‍ധിപ്പിക്കും. പുതിയ നിക്ഷേപകരെ ആകര്‍ഷിക്കുകയും നിലനിര്‍ത്തുകയും ചെയ്യുമെന്നും യൂസുഫലി കൂട്ടിച്ചേര്‍ത്തു.

മനാമയിലെത്തിയ യൂസുഫലി ബഹ്‌റയ്ന്‍ രാജാവ് ഹമദ് ബിന്‍ ഈസ അല്‍ ഖലീഫ, കിരീടാവകാശിയും പ്രധാനമന്ത്രിയുമായ സല്‍മാന്‍ രാജകുമാരന്‍ എന്നിവരുമായി കൂടിക്കാഴച നടത്തി. നിക്ഷേപ വര്‍ധനക്കൊപ്പം ആഗോള പ്രതിഭകളെ ആകര്‍ഷിക്കുക എന്ന ലക്ഷ്യത്തോടെ ഗോള്‍ഡന്‍ റെസിഡന്‍സി വിസ നല്‍കുമെന്ന് ഒരാഴ്ച മുമ്പാണ് ബഹ്‌റൈന്‍ പ്രഖ്യാപിച്ചത്.