കണ്ണൂരില്‍ കോണ്‍ഗ്രസ് കൗണ്‍സിലര്‍ക്കെതിരേ മാനഭംഗത്തിന് കേസ്; പാര്‍ട്ടിയില്‍ നിന്ന് സസ്‌പെന്റ് ചെയ്തു

കണ്ണൂര്‍: കോണ്‍ഗ്രസ് നേതാവും കണ്ണൂര്‍ കോര്‍പറേഷന്‍ കൗണ്‍സിലറുമായ പി വി കൃഷ്ണകുമാറിനെതിരേ മാനഭംഗത്തിന് പോലിസ് കേസെടുത്തു. ജോലിസ്ഥലത്തുവച്ച് മാനഭംഗപ്പെടുത്തിയെന്ന സഹകരണസംഘം ജീവനക്കാരിയുടെ പരാതിയുടെ അടിസ്ഥാനത്തിലാണ് കോണ്‍ഗ്രസ് കിഴുന്ന ഡിവിഷന്‍ കൗണ്‍സിലറും കണ്ണൂര്‍ ബ്ലോക്ക് കോണ്‍ഗ്രസ് വൈസ് പ്രസിഡന്റുമായ കൃഷ്ണകുമാറിനെതിരേ എടക്കാട് പോലിസ് കേസെടുത്തത്.

സംഭവം വിവാദമായ പശ്ചാത്തലത്തില്‍ കൃഷ്ണകുമാറിനെ കോണ്‍ഗ്രസില്‍ നിന്ന് സസ്‌പെന്റ് ചെയ്തു. പാര്‍ട്ടിയുടെ അച്ചടക്കത്തിന് നിരക്കാത്ത രീതിയില്‍ പ്രവര്‍ത്തിച്ചുവെന്ന ആരോപണത്തിന്റെ അടിസ്ഥാനത്തില്‍ കൃഷ്ണകുമാറിനെ ഡിസിസി പ്രസിഡന്റ് അഡ്വ. മാര്‍ട്ടിന്‍ ജോര്‍ജാണ് സസ്‌പെന്റ് ചെയ്തത്.