പത്ത് മാസമായിട്ടും വധുവിനെ കണ്ടെത്തി നല്‍കിയില്ല; വിവാഹ ബ്യൂറോക്ക് 7000 രൂപ പിഴ

തലശ്ശേരി: ഒരു വര്‍ഷം സമയമെടുത്തിട്ടും വധുവിനെ കണ്ടെത്തി നല്‍കാത്ത വിവാഹ ബ്യൂറോ യുവാവിന് 7000 രൂപ നഷ്ടപരിഹാരം നല്‍കണമെന്ന് ഉത്തരവ്. പാനൂര്‍ പുത്തന്‍പുരയില്‍ വീട്ടില്‍ പി കെ സുമേഷിന്റെ പരാതിയില്‍ കണ്ണൂര്‍ ഉപഭോക്തൃ തര്‍ക്കപരിഹാര ഫോറമാണ് ഉത്തരവിറക്കിയത്.

രണ്ടുമാസംകൊണ്ട് അനുയോജ്യമായ വധുവിനെ കണ്ടെത്തി നല്‍കുമെന്ന് വിവാഹബ്യൂറോ വാഗ്ദാനം ചെയ്തതായി പരാതിയില്‍ പറയുന്നു. രജിസ്‌ട്രേഷന്‍ ഫീസായി 4900 രൂപയാണ് വാങ്ങിയത്. 2024 ജനുവരി 14ന് പണം നല്‍കി 10 മാസം കഴിഞ്ഞിട്ടും മറുപടി നല്‍കുകയോ വാക്ക് പാലിക്കുകയോ ചെയ്തില്ല. അന്വേഷണം തുടരുകയാണെന്ന മറുപടിയാണ് ഫോണ്‍ വിളിച്ചപ്പോള്‍ ലഭിച്ചത്. തുടര്‍ന്നാണ് ഉപഭോക്തൃ തര്‍ക്കപരിഹാര ഫോറത്തെ സമീപിച്ചത്.