ഐഎസ്എല്‍; വീണത് 10 ഗോള്‍; ഈസ്റ്റ് ബംഗാളിനെ തകര്‍ത്ത് ഒഡീഷാ എഫ് സി

പനാജി: ഇന്ത്യന്‍ സൂപ്പര്‍ ലീഗില്‍ ഇന്ന് നടന്ന ആവേശ പോരാട്ടത്തില്‍ ഈസ്റ്റ് ബംഗാളിനെതിരേ ഒഡീഷാ എഫ് സിക്ക് തകര്‍പ്പന്‍ ജയം. 10 ഗോള്‍ വീണ മല്‍സരത്തില്‍ ആവേശം ഇഞ്ചുറി ടൈം വരെ നീണ്ടുനിന്നു. ഈസ്റ്റ് ബംഗാളിനെ 6-4നാണ് ഒഡീഷാ എഫ് സി വീഴ്ത്തിയത്. ഒഡീഷയ്ക്ക് വേണ്ടി ഹെക്ടര്‍ റൊഡാസ് (33, 40), അരിഡായ് കബറേരാ (71, ഇഞ്ചുറി ടൈം) എന്നിവര്‍ ഇരട്ട ഗോള്‍ നേടി. ഹാവി ഹെര്‍ണാണ്ടസ്(45), ഇസാഖ് റാള്‍ട്ടെ (83) എന്നിവരും ഒഡീഷയ്ക്കായി വലകുലിക്കി. ഡാരന്‍ സിഡോയിലൂടെ 13ാം മിനിറ്റില്‍ ഈസ്റ്റ് ബംഗാളാണ് ലീഡെടുത്തത്. എന്നാല്‍ ആദ്യ പകുതിയില്‍ മൂന്ന് ഗോള്‍ തിരിച്ചടിച്ച് ഒഡീഷ ലീഡെടുത്തു. 81ാം മിനിറ്റിലാണ് തോങ്കോസിങിലൂടെ ബംഗാള്‍ രണ്ടാം ഗോള്‍ നേടിയത്. ഇഞ്ചുറി ടൈമില്‍ പെനാല്‍റ്റി ഉള്‍പ്പെടെ രണ്ട് ഗോളും ഈസ്റ്റ് ബംഗാള്‍ ഒഡീഷാ പോസ്റ്റിലേക്ക് അടിച്ചു. രണ്ട് ഗോളും ഡാനിയേല്‍ ചിമാ ചുക്കുവിന്റെ വകയായിരുന്നു. 4-1 എന്ന നിലയില്‍ നിന്നാണ് ഈസ്റ്റ് ബംഗാള്‍ മൂന്ന് ഗോള്‍ തിരിച്ചടിച്ച് മുഖം രക്ഷിച്ചത്.