ഉറങ്ങുകയാണെന്ന് കരുതി: അമ്മ മരിച്ചത് അറിയാതെ 10 വയസ്സുകാരന്‍ മൃതദേഹത്തിനൊപ്പം കഴിഞ്ഞത് നാലു ദിവസം

വിദ്യാനഗര്‍: അമ്മ മരിച്ചറിയാതെ 10 വയസ്സുകാരന്‍ മൃതദേഹത്തിനൊപ്പം കഴിഞ്ഞത് നാലു ദിവസം. തമിഴ്‌നാട്ടിലെ തിരുപ്പതിയിലെ വിദ്യാനഗറിലാണ് ഞെട്ടലുളവാക്കുന്ന സംഭവം. ശനിയാഴ്ച മൃതദേഹത്തില്‍നിന്നും ദുര്‍ഗന്ധം വമിച്ചതോടെ കുട്ടി അമ്മാവനെ വിവരം ധരിപ്പിക്കുകയായിരുന്നു. അമ്മാവന്‍ എത്തിയതോടെയാണ് മരണവിവരം പുറത്തറിഞ്ഞത്. വിദ്യാനഗര്‍ സ്വദേശിനി രാജ്യലക്ഷ്മിയാണ് മരിച്ചത്.

കുഴഞ്ഞുവീണതാകാം മരണകാരണമെന്നാണ് പ്രാഥമിക നിഗമനമെന്നാണ് പോലിസ് പറയുന്നത്. ഭര്‍ത്താവുമായുണ്ടായ അസ്വരസ്യങ്ങളെ തുടര്‍ന്ന് രാജ്യക്ഷ്മിയും മകനും തനിച്ചാണ് താമസിച്ച് വന്നിരുന്നത്.

ഇവര്‍ മാര്‍ച്ച് എട്ടിന് ഛര്‍ദ്ദിക്കുകയും ശേഷം ഉറങ്ങുകയുമായിരുന്നുവെന്നുമാണ് മകന് പോലിസിനോട് പറഞ്ഞത്. ക്ഷീണം കാരണം അമ്മ വിശ്രമിക്കുകയാണെന്നാണ് മകന്‍ കരുതിയത്. അതിനാല്‍ ശല്യപ്പെടുത്തിയില്ല. മൃതദേഹത്തില്‍ നിന്നും ദുര്‍ഗന്ധം വമിച്ചതോടെയാണ് അമ്മാവനെ വിവരമറിയിച്ചത്. മൃതദേഹം പൊലിസ് സ്വകാര്യ ആശുപത്രിയിലേക്ക് മാറ്റി. പോസ്റ്റ്മാര്‍ട്ടത്തിന് ശേഷമേ മരണ കാരണം വ്യക്തമാകൂവെന്നും പോലിസ് അറിയിച്ചു.