റഷ്യന്‍ സേനയുടെ ഷെല്ലാക്രമണം; യുക്രെയ്‌നില്‍ ഇന്ത്യന്‍ വിദ്യാര്‍ഥി കൊല്ലപ്പെട്ടു

കീവ്: യുക്രെയ്‌നില്‍ റഷ്യന്‍ സേന നടത്തിയ ഷെല്ലാക്രമണത്തില്‍ ഇന്ത്യക്കാരനായ വിദ്യാര്‍ഥി കൊല്ലപ്പെട്ടു. ഖര്‍ക്കീവിലുണ്ടായ ഏറ്റുമുട്ടലിനിടെ കര്‍ണാടകയിലെ ഹവേരി സ്വദേശി എസ് ജി നവീന്‍ (21) ആണ് മരിച്ചത്. സ്റ്റുഡന്റ് കോ-ഓഡിനേറ്റര്‍മാരാണ് ഇക്കാര്യം അറിയിച്ചത്. നാലാം വര്‍ഷ എംബിബിഎസ് വിദ്യാര്‍ഥിയാണ് നവീന്‍. മരണം വിദേശകാര്യമന്ത്രാലയം സ്ഥിരീകരിച്ചിട്ടുണ്ട്.

നവീന്‍ താമസിച്ചിരുന്ന ബങ്കറിനുള്ളില്‍ നിന്നും പുറത്തിറങ്ങിയ സമയം ആക്രമണമുണ്ടാവുകയായിരുന്നു. ഇന്ന് രാവിലെ ഖര്‍ക്കീവില്‍ ഷെല്ലാക്രമണത്തില്‍ ഒരു ഇന്ത്യന്‍ വിദ്യാര്‍ഥിക്ക് ജീവന്‍ നഷ്ടപ്പെട്ടുവെന്ന് അഗാധമായ ദു:ഖത്തോടെ ഞങ്ങള്‍ സ്ഥിരീകരിക്കുന്നു. മന്ത്രാലയം അദ്ദേഹത്തിന്റെ കുടുംബവുമായി ബന്ധപ്പെട്ടിട്ടുണ്ട്- വിദേശകാര്യ മന്ത്രാലയത്തിന്റെ ഔദ്യോഗിക വക്താവ് അരിന്ദം ബാഗ്ചി തന്റെ ഔദ്യോഗിക ട്വിറ്ററില്‍ പോസ്റ്റ് ചെയ്തു.