തെന്മലയില്‍ യുവാവിന് നേരെ ആക്രമണം; സ്ത്രീ സുഹൃത്തിന്റെ വീട്ടില്‍ നിന്നും വിളിച്ചിറക്കി മര്‍ദ്ദിച്ചു
സ്ത്രീയുടെ വീട്ടില്‍ നിഷാദ് ഉണ്ടെന്നറിഞ്ഞ നാല്‍വര്‍ സംഘം കരുതിക്കൂട്ടി അവിടേക്ക് എത്തുകയായിരുന്നുവെന്നാണ് പോലിസ് പറയുന്നത്.
കൊല്ലം: തെന്മലയില്‍ സ്ത്രീ സുഹൃത്തിന്റെ വീട്ടില്‍ നിന്നും വിളിച്ചിറക്കി യുവാവിനെ നഗ്നനാക്കി പോസ്റ്റില്‍ കെട്ടിയിട്ട് മര്‍ദ്ദിച്ചു. ഇടമണ്‍ സ്വദേശി നിഷാദിനാണ് മര്‍ദനമേറ്റത്. സംഭവത്തില്‍ ഇടമണ്‍ സ്വദേശികളായ സുജിത്, രാജീവ്, സിബിന്‍, രാജീവ് എന്നിവരെ അറസ്റ്റ് ചെയ്തു.
സ്ത്രീയുടെ വീട്ടില്‍ നിഷാദ് ഉണ്ടെന്നറിഞ്ഞ നാല്‍വര്‍ സംഘം കരുതിക്കൂട്ടി അവിടേക്ക് എത്തുകയായിരുന്നുവെന്നാണ് പോലിസ് പറയുന്നത്. വീട്ടിലെ കോളിങ് ബെല്‍ ശബ്ദം കേട്ട് സ്ത്രീ സുഹൃത്ത് പുറത്തിറങ്ങിയ സമയം നിഷാദ് വീടിന്റെ പിന്‍വശത്തുകൂടി രക്ഷപ്പെടാന്‍ ശ്രമിച്ചു. എന്നാല്‍ നാല്‍വര്‍ സംഘം നിഷാദിനെ ബലമായി തടഞ്ഞുനിര്‍ത്തി വീടിന്റെ മുന്നിലെ റോഡിലേക്ക് കൊണ്ടുപോയി കൈവശം കരുതിയിരുന്നു കമ്പി കൊണ്ട് മര്‍ദിക്കുകയായിരുന്നു.
വാള്‍ ഉപയോഗിച്ച് നിഷാദിനെ വെട്ടാനുള്ള ശ്രമവും നടന്നതായി പോലിസ് പറയുന്നു. നിഷാദ് ധരിച്ചിരുന്ന വസ്ത്രം ബലമായി അഴിച്ചുമാറ്റി ശരീരമാസകലം മര്‍ദിച്ചു. തുടര്‍ന്നാണ് നഗ്‌നനായ നിഷാദിനെ ഇലക്ട്രിക് പോസ്റ്റില്‍ കെട്ടിയിട്ടത്. ഈ ദൃശ്യങ്ങള്‍ മൊബൈലില്‍ പകര്‍ത്തി സമൂഹമാധ്യമങ്ങളില്‍ പ്രചരിപ്പിക്കുകയും ചെയ്തു. ഇതോടെയാണ് പോലിസ് നടപടി തുടങ്ങിയത്.
