കണ്ണൂരില്‍ വീട്ടുവളപ്പില്‍നിന്ന് അഞ്ച് ഐസ്‌ക്രീം ബോംബുകള്‍ കണ്ടെത്തി

കണ്ണൂര്‍: ധര്‍മടത്ത് വീട്ടുവളപ്പില്‍നിന്ന് അഞ്ചു ഐസ്‌ക്രീം ബോംബുകള്‍ കണ്ടെത്തി. ധര്‍മടം മേലൂര്‍ ചെങ്കൊടിക്കണ്ണ വായനശാലയ്ക്ക് സമീപത്തുള്ള വീട്ടുവളപ്പില്‍നിന്നുമാണ് അത്യുഗ്രശേഷിയുള്ള അഞ്ച് ഐസ്‌ക്രീം ബോംബുകള്‍ കണ്ടെടുത്തത്. വീട്ടുവളപ്പില്‍ തെങ്ങിന് തളമിട്ടുകൊണ്ടിരിക്കെ തൂമ്പ തട്ടിയതിനെ തുടര്‍ന്ന് പരിശോധിച്ചപ്പോള്‍ പ്ലാസ്റ്റിക് ഡബ്ബയില്‍ പ്ലാസ്റ്റിക് കവറില്‍ പൊതിഞ്ഞ നിലയില്‍ അഞ്ചു ബോംബുകള്‍ കണ്ടെത്തുകയായിരുന്നു.

പ്രായമായ സ്ത്രീ തനിച്ചുതാമസിക്കുന്ന വീട്ടുവളപ്പില്‍നിന്നുമാണ് ബോംബുകള്‍ കണ്ടെത്തിയത്. ജോലിക്കാര്‍ വിവരമറിയിച്ചതിനെ തുടര്‍ന്ന് ധര്‍മടം എസ്‌ഐ മഹേഷ് കണ്ടമ്പത്തിന്റെ നേതൃത്വത്തിലുള്ള പോലിസ് സംഭവസ്ഥലത്തെത്തി പരിശോധന നടത്തി. തൂമ്പയില്‍ ചെറുതായി തട്ടിയതിനെ തുടര്‍ന്നാണ് വലിയ അപകടമൊഴിവായത്. ബോംബ് സ്‌ക്വാഡും സ്ഥലത്തെത്തിയിരുന്നു.