ഏഷ്യന്‍ കപ്പ് യോഗ്യതാ മത്സരം: ഇന്ത്യ ഇന്ന് ബംഗ്ലാദേശിനെ നേരിടും; പ്രതീക്ഷ ഛേത്രിയില്‍; ബംഗ്ലാ നിരയില്‍ ഹംസ ചൗധരിയും

ഷില്ലോങ്: ഏഷ്യന്‍ കപ്പ് ഫുട്‌ബോള്‍ യോഗ്യതാ റൗണ്ടിലെ ആദ്യമത്സരത്തില്‍ ഇന്നു ഇന്ത്യ ബംഗ്ലദേശിനെ നേരിടും.ഷില്ലോങ് രാജീവ് ഗാന്ധി സ്റ്റേഡിയത്തില്‍ ഇന്നു രാത്രി ഏഴിനാണു കിക്കോഫ്. വിരമിക്കല്‍ തീരുമാനം പിന്‍വലിച്ച് രാജ്യാന്തര ഫുട്‌ബോളിലേക്കു ഗോളടിച്ചെത്തിയ സുനില്‍ ഛേത്രിയിലാണ് ഇന്ത്യയുടെ പ്രതീക്ഷ. കഴിഞ്ഞയാഴ്ച മാലദ്വീപിനെതിരായ സൗഹൃദ മത്സരത്തില്‍ സ്‌കോര്‍ ചെയ്തതോടെ ഛേത്രിയുടെ കരിയര്‍ ഗോള്‍നേട്ടം 95 ആയിക്കഴിഞ്ഞു. കഴിഞ്ഞയാഴ്ച മാലദ്വീപിനെതിരായ സൗഹൃദ മത്സരത്തില്‍ സ്‌കോര്‍ ചെയ്തതോടെ ഛേത്രിയുടെ കരിയര്‍ ഗോള്‍നേട്ടം 95 ആയിക്കഴിഞ്ഞു.

ഇന്നത്തെ ഇന്ത്യയുടെ പ്രധാന എതിരാളി ഒരേയൊരാളാണ്; ഡിഫന്‍സീവ് മിഡ്ഫീല്‍ഡര്‍ ഹംസ ചൗധരി! ഇംഗ്ലണ്ട് അണ്ടര്‍ 23 ടീമില്‍ വരെ കളിച്ച ശേഷം മാതാവിന്റെ ജന്മനാടായ ബംഗ്ലദേശിന്റെ ജഴ്‌സിയണിയാന്‍ തീരുമാനിച്ച ഹംസയുടെ പ്രതിരോധപ്പൂട്ട് പൊട്ടിച്ചു ഗോളടിക്കുകയെന്നതാണ് ഇന്ന് ഇന്ത്യയ്ക്കു മുന്നിലുള്ള പ്രധാന വെല്ലുവിളി. ഇംഗ്ലിഷ് പ്രിമിയര്‍ ലീഗ് ക്ലബ് ലെസ്റ്റര്‍ സിറ്റിയുടെ അക്കാദമിയിലൂടെയാണ് ഹംസ പ്രഫഷനല്‍ ഫുട്‌ബോളിലെത്തിയത്. പിന്നീടു രണ്ടാം ഡിവിഷന്‍ ക്ലബ് ഷെഫീല്‍ഡ് യുണൈറ്റഡിലെത്തി. ഇംഗ്ലണ്ട് അണ്ടര്‍ 23 ടീമില്‍ കളിച്ചിട്ടുള്ള ഹംസ കഴിഞ്ഞ ഡിസംബറിലാണ് ബംഗ്ലദേശിനായി കളിക്കാനുള്ള അനുമതി നേടിയത്.

ഇരുപത്തിയേഴുകാരന്‍ ഹംസയ്ക്കുള്ള ഇന്ത്യയുടെ മറുപടി നാല്‍പതുകാരന്‍ ഛേത്രി തന്നെ. ഫിഫ റാങ്കിങ്ങില്‍ 126ാം സ്ഥാനത്താണ് ഇന്ത്യയെങ്കില്‍ ബംഗ്ലദേശ് 185ാം സ്ഥാനത്താണ്.